DR. MOCHTAR NAIM, 4 Alasan Perjuangkan DIM

Dr. Mochtar Naim: 4 Alasan DIM

BASAMO KITO MAMBANGUN
PROVINSI DAERAH ISTIMEWA MINANGKABAU
Oleh Mochtar Naim

Manolah kawan-kawan sasamo Minang di ranah dan di rantau dima sajo,
Assalamu’alaikum w.w.,
Mamakai istilah “Minangkabau” pangganti Sumbar alias Sumatera Barat nan awak pakai salamo ko untuak Provinsi Sumatera Barat, itu bana nan awak inginkan salamo ko. Tapi bukan itu sajo. Kito manginginkan Provinsi Sumatera Barat dengan manuka namonyo manjadi Provinsi Minangkabau yang bersifat “istimewa” ataupun “khusus,” seperti nan dibukakan pintunya oleh Fasal 18 B UUD 1945 itu. Kini sajo lah ado ampek Provinsi nan mamanfaatkan peluang itu; yaitu Aceh, Yogya, Jakarta dan Papua. Konon Jawa Barat pun sudah ado pulo punyo kainginan nak mamakai istilah Provinsi Jawa Barat manjadi Provinsi Sunda. Salagi itu barupo keinginan dari rakyat yang bersangkutan sendiri, Fasal 18 B UUD 1945 sudah barang tentu mambuliahkannyo.

Awak urang Minang lah anam tahun manyuarokan agar Provinsi Sumbar barubah manjadi Provinsi DIM, alias Provinsi Daerah Istimewa Minangkabau. Kalau bisa awak sakali jalan sajo malakukannyo. Tidak basiansua seperti nan diinginkan oleh Bung Fadli Zon tu. Nan diparalukan tingga kasapakatan awak basamo. Sajauah ko, rasonyo mayoritas urang Minang, baiak nan di ranah, apo lai nan di rantau, manginginkan Provinsi Minangkabau yang bersifat istimewa. Apo lai saketeknyo ado ampek hal utamo nan mandorong Provinsi Minangkabau itu bersifat Istimewa.

Ka ampek hal utama itu adolah: Satu, masyarakat Minangkabau bersifat matrilineal, bukan patrilineal, dan bukan pula matriarkal, nan jarang basuo dima sajo di dunia ko. Intinyo adolah penghargaan tertinggi nan dibarikan kapado “Ibu” alias wanita atawa perempuan dalam kehidupan barumah tanggo dan bamasyarakat, seiramo jo ajaran Islam nan juo menempatkan Ibu sebagai nan sangat dihormati. Katiko ditanyo sia nan paliang patuik untuak dihormati, mako jawabnyo sampai tigo kali: “ibumu, ibumu, ibumu.” Tapi itu bana pulo nan lah manurun salamo ko di Minang sandiri sebagai akibat dari masuaknyo pangaruah lua ka dalam masyarakat Minang. Jadi tugas awak mangambalikan penghargaan nan lah luntur kapado wanita tu untuak dinaikkan baliak.

Kaduo, filosofi kehidupan nan dipakai di Minang dek urang Minang salama ko adolah filosofi ABS-SBK: Adat Basandi Syarak, Syarak Basandi Kitabullah. Adat nan dipakai adolah Adat nan sajalan jo Syarak. Nan tak sajalan dibuang. Jadi urang Minang tu esensinya baagamo Islam. Bukan urang Minang kalau indak baagamo Islam. Tapi itu pulo nan tajadi balakangan ko, sahinggo baiak di Padang maupun di Jakarta kini lah ado organisasi gereja Minang. Dan alah pulo ado Injil babahaso Minang. Urang Minang nan bapindah agamo juo lah ado, walaupun jumlahnyo masih saketek.

Katigo, malalui supremasi budaya Jawa ka seluruh daerah di Indonesia ko, sistem pemerintahan tarandah di NKRI ko adolah Desa seperti di Jawa. Sadang di Minang salamo ko bukan Desa tapi Nagari nan sistem maupun strukturnyo babeda dengan Desa di Jawa. Nagari di Minangkabau adolah bagaikan “republik-republik kecil” (petites republiques) nan unsur eksekutif, legislatif dan yudikatifnyo ado di tingkek Nagari sendiri. Sistem kapamimpinannyo pun juo tabagi tigo: Niniak-mamak, Alim-ulama dan cadiak-pandai, nan masiang-masiang mawakili unsur Adat, Agamo dan Budaya.

Kaampek, masyarakat dan budaya Minang mamiliki sistem kepemilikan harato kapado duo bagian: Harato Pusako Tinggi dan Harato Pusako Randah. Harato Pusako Tinggi, tamasuak tanah, parumahan, dan nan tak bergerak lainnyo, tidak dipajua-balikan tapi diturunkan ka katurunan berikutnyo. Samantaro harato pusako randah buliah dijua dan dipindah-tangankan sacaro hukum faraidh, jiko paralu.

Minimal untuak nan ampek tu balaku hukum adat dan hukum faraidh sakaligus. Karanonyo untuak nan ampek tu indak balaku hukum negara. Makonyo harus diistimewakan nan untuangnyo difasilitasi pulo dek UUD 1945 pasal 18 tu. Jadi indak ado kasulitan nan dihadoki, nan dek karano itu pulo pelaksanaan Provinsi DIM indak paralu batingkek, separti nan disarankan dek Bung Fadli Zon tu. Bisa sakali lacuik sajo. Dan itu nan paralu awak sepakati sacaro basamo sacaro baranah dan barantau. Kasapakatan tu rancaknyo manyaluruah. Indak bapihak-pihak. Saluruh unsur masyarakat, baik pamarentahan, sajak dari Gubernur ka Bupati, ka Wali Kota, ka Camat, ka Wali Nagari, sadonyo manggampai. Baitu pulo wakil-wakil rakyat nan duduak di DPR, MPR, DPRD, sarato ormas-ormas nan ado, baiak niniak mamak, alim ulama, cadiak pandai, pemuda, bundo kanduang, manuruik tugas mereka masiang-masiang. Nan pantiang adolah kasapakatan tu. Kalau awak sapakat, sadonyo manjadi gampang. Apo lai NKRI mambari paluang pulo untuak itu.

Dek karano Desember lah dakek, masonyo awak malakukan Pemilu di Daerah, mari kito sairama dan saio sakato manyapakati terbentuknyo Provinsi Daerah Istimewa Minangkabau alias DIM tu. Semoga Allah swt memberkati, amin.
MN
Ciputat, Tangerang Selatan, 24 Oktober 2020
Note: Shofwan Karim mendukung penuh dan mari kito basamo perjuangkan sampai berhasil. Basamo mako manjadi. Insya Allah.

Diterbitkan oleh Home of My Thought, Talk, Writing and Effort

Mengabdi dalam bingkai rahmatan li al-alamin untuk menggapai ridha-Nya.

%d blogger menyukai ini: